အချစ်တဏှာ မရှိအောင် မေတ္တာသတိဆောင်
+++++++++++++++++
သံယောဇဉ်နဲ့ သတိရခြင်း ဆိုတာ
အင်မတန် ပူလောင်ပါတယ် ၊
ဒါဆိုရင် သံယောဇဉ်ကို ဖြတ်သင့်လား ?
မဖြတ်သင့်ဘူးလား ? ဖြတ်သင့်တယ် ၊
ဖြတ်သင့်တယ် ဆိုပြီး ကွာရှင်းပြတ်စဲရမှာ မဟုတ်ဘူးနော်၊
စိတ်ထဲမှာ ရှိနေတဲ့ သံယောဇဉ်ဓါတ်တွေကို
ပါးသည်ထက် ပါးသွားအောင် ကြိုးစားရမယ်၊
သံယောဇဉ်နေရာမှာ မေတ္တာ အစားထိုးရမယ်၊
သံယောဇဉ်နေရာမှာ သဒ္ဓါ ၊ ဝီရိယ ၊သတိ ၊ သမာဓိ၊ ပညာ၊ သူတော်ကောင်းဓါတ်တွေ အစားထိုးရမယ် ။
ဒါဆိုရင် တဏှာဓါတ်တွေ ပါး ပါးမသွားဘူးလား ?
----------------------------------------------
"နွယ်တစ်မျှင် မြက်တစ်ပင်လို . . . သံယောဇဉ်ကို အလွယ် ဖြတ်နိုင်တဲ့သူ ဖြစ်ရပါလိုသည် ၊ တဲ့ ။
မြန်မာဂန္ဓဝင်သီချင်းတွေထဲက ရေနံချောင်းသား ကိုတင်လှိုင် ဆိုထားတဲ့ " အမုန်းခွန်အား ပေးသနားပါ" ဆိုတဲ့ သီချင်းထဲ က " နွယ်တစ်မျှင် မြက်တစ်ပင်လို . . . သံယောဇဉ်ကို အလွယ်တကူ ဖြတ်နိုင်တဲ့သူ . . . ဖြစ်လိုပါသည်" ကို အကြိုက်ဆုံးပါပဲ ။
ဘာဖြစ်လို့လဲ ဆိုတော့ တရားသဘောတွေ အပြည့်ပါလို့လေ ။ အဲဒီသီချင်း ကြိုက်လို့လဲ ဘုန်းကြီး ဖြစ်တာ ဖြစ်နိုင်တယ်နော် . . . .။
ဘယ်လောက်များ ကောင်းလိုက်လဲ ၊
နွယ်ပင်လေးကို ဆွဲဖြတ်လိုက်သလို ၊မြက်ပင်လေးကို ဆွဲဖြတ်လိုက်သလို . . .သံယောဇဉ်အမျှင်တန်းတွေကိုလည်း ရုတ်တရက် အလွယ်တကူ ထောက်ကနဲ ချိုးဖြတ်နိုင်သူ ဖြစ်ပါရစေ" တဲ့ ။
ခု . . တရားနာပရိတ်သတ်များရော သံယောဇဉ်တွေ ဖြတ်ချင်တဲ့စိတ် ရှိရဲ့လား၊
" ရှိပါတယ်ဘုရား"
"အံမယ် . .ရှိတယ်တဲ့ ၊ နေပါဦး . သံယောဇဉ်ကို
နွယ်တစ်မျှင် ၊ မြက်တစ်ပင်လို ဖြတ်ချင်တာလား ၊
သစ်ကိုင်းတစ်ကိုင်းလို ဖြတ်ချင်တာလား ၊
ခု . . .တရားနာပရိတ်သတ်များရဲ့ သံယောဇဉ်က
နွယ်တစ်မျှင်လား ၊ သစ်ကိုင်းတစ်ကိုင်းလား ၊
-သစ်ကိုင်းတစ်ကိုင်းပါ ဘုရား ၊
သစ်ကိုင်းမှာ မန်ကျည်းကိုင်းလား ၊ တမာကိုင်းလား၊
-မန်ကျည်းကိုင်း ဆိုရင် . .
"မန်ကျည်းတစ်ညို ၊ လူတစ်ကိုယ်တဲ့ ၊
လက်တစ်ဆစ်လောက်ပဲတုတ်တဲ့ မန်ကျည်းကိုင်းလေး တစ်ကိုင်းကလည်း လူတစ်ကိုယ် ရပ်တည်လို့ မရဘူးလား ၊
ရတယ် ၊ တော်တော်နဲ့ မကျိုးဘူး ။
"တမာတစ်ကိုင်း လူ့သချင်္ိုံင်းတဲ့ ။
တမာကိုင်းက ဆတ်တယ် ၊ ကျိုးလွယ်တယ်လေ ၊
ဒါကြောင့် တမာကိုင်းပေါ် လူတက်လိုက်ရင် အလွယ်တကူ ကျိုးပြီး လူသေသွားနိုင်တယ် လို့ ပြောတာ ။
သေရင် သချိင်္ုင်း ရောက်မှာမို့ " တမာတစ်ကိုင်း လူ့သင်္ခ်ျုင်းတဲ့။
သစ်ကိုင်းသံယောဇဉ်သမားတွေမှာလည်း . .
မန်ကျည်းကိုင်းသံယောဇဉ်နဲ့ တမာကိုင်းသံယောဇဉ် လို့ နှစ်မျိုး ရှိပြန်တာပေါ့ ။
မန်ကျည်းကိုင်းသံယောဇဉ်က က ဖြတ်ဖို့ သိပ်ခက်တယ် ။ အစွဲအလန်း အရမ်းကြီးလို့ ။
တမာကိုင်းသံယောဇဉ်က ဖြတ်ဖို့လွယ်တယ် ။ အစွဲအလန်း မကြီးလို့ ။
အဲဒီတော့ ကိုယ့်သံယောဇဉ်ဟာ မန်ကျည်းကိုင်း ဖြစ်သင့်လား ။ တမာကိုင်း ဖြစ်သင့်လား ။
-တမာကိုင်း ဖြစ်သင့်ပါတယ်ဘုရား ၊
အဲဒီကျတော့လည်း . .
"တမာတောမှာ ပျော်တယ် ဆိုတဲ့ .. မောင်ရေ . . မောင်ရေ" ဆိုတာက လာဦးမှာ ။ မခက်ဘူးလား ။ ခက်တာပဲ ။ ဒါကြောင့် . . . ဆိုလိုက်ပါ ။
-----------------------------------------------
"မေတ္တာနဲ့သာ အေးချမ်းစွာ စိတ်မှာ သတိရ"
ကိုယ်ချစ်တဲ့သူ ၊ ကိုယ်သံယောဇဉ် ရှိတဲ့သူကို သတိမရဖို့ ဖြစ်မှ မဖြစ်နိုင်တာ ။
တစ်ဖက်သားကိုလည်း သတိမရနဲ့လို့ တားဆီးလို့ မရဘူး ။
ကိုယ်ကိုယ်တိုင်လဲ မေ့ပစ်လိုက်လို့ မရဘူး
အဲဒီတော့ သတိရတဲ့အခါမှာ . . . .
ကိုယ့်စိတ်ကိုယ်စစ်လိုက် ၊ တဏှာနဲ့ သတိရနေတာလား ၊ မေတ္တာနဲ့ သတိရနေတာလား ၊ တဏှာနဲ့ သတိရနေရင် မေတ္တာ ဖြစ်အောင် မြန်မြန် ပြောင်းလိုက်ပါ။
ကိုယ်ချစ်တဲ့သူကို သတိရတယ်။ပျော်ခဲ့ပါးခဲ့ ကြည်နူးခဲ့ တာတွေကို သတိရမနေဘဲနဲ့ ၊ ပျော်ချင်ပါးချင်တဲ့စိတ်နဲ့ သတိရမနေဘဲနဲ့ " ကျန်းမာပါစေ ၊ ချမ်းသာပါစေ" မေတ္တာလေးပွားပြီး သတိရတော့ အေးချမ်းသွားတယ် ။
ကိုယ်ချစ်တဲ့သူကို ကူညီစောင့်ရှောက်ခဲ့တာလေးတွေ ၊ ပေးကမ်း လှူဒါန်းခဲ့တာလေးတွေကို ပြန်တွေးလိုက်တော့ စာဂါနုဿတိ ဘာဝနာတောင် ဖြစ်သွားသေးတယ် ။
သတိရနည်းလေး ပြောပေးတာနော် ။
သတိမရနဲ့လို့ တားနေတာ မဟုတ်ပါဘူး ၊
-တဏှာနဲ့ သတိမရပါနဲ့ ၊ မေတ္တာနဲ့ သတိရပါ ၊
-ဒေါသနဲ့ သတိမရပါနဲ့ ၊ ကရုဏာနဲ့ သတိရပါ ၊
-ဣဿာနဲ့ သတိမရပါနဲ့ ၊ မုဒိတာနဲ့ သတိရပါ ၊
စသည်ဖြင့်ပေါ့နော် ၊ သတိရနည်း မှန်ကန်ဖို့ ပြောပေးနေတာပါ ။
မေတ္တာ ၊ ကရုဏာ ၊ မုဒိတာ လို့ခေါ်တဲ့ သူတော်ကောင်း တရားလေးတွေနဲ့ သတိရနေမယ် ဆိုရင် စိတ်လည်း အေးချမ်းပါတယ် ။ ကုသိုလ်တရားတွေလည်း တိုးပွားပါတယ်။
ပေးခဲ့ ၊ ကမ်းခဲ့ ၊ လှူခဲ့ ၊ တန်းခဲ့တာတွေကို အများအားဖြင့် ပြန်ပြီး မစဉ်းစားမိတတ်ဘူး ။
ကိုယ်ချစ်ခင်မြတ်နိုးတဲ့ ၊ ကြည်ညိုလေးစားတဲ့သူကို သတိရနေတယ် ဆိုရင် . . သတိရမှုနဲ့အတူ တွဲပြီး ကိုယ်ပေးလှူခဲ့ ၊ ကူညီခဲ့တာတွေ ကို ပြန်ပြီးတော့ သတိရသင့်တယ် ။
ဒါဆိုရင် ကိုယ်ပြုခဲ့တဲ့ ကုသိုလ်တွေကလည်း အားကောင်း သည်ထက် အားကောင်းလာမယ် ။ မေတ္တာဓာတ်တွေလည်း ပို ပိုလာမယ် ။
သူ့အပေါ်မှာတွင် မဟုတ်ဘူး ၊ တခြားသော ပုဂ္ဂိုလ်တွေ အပေါ်မှာလည်း မေတ္တာဓာတ်တွေ ထားနိုင်လာတယ် ။
ကိုယ်ချစ်တဲ့သူအပေါ် မေတ္တာထားခဲ့တာတွေ ထပ်ကာထပ်ကာ သတိရဖန် များလာရာကနေ မေတ္တာဓာတ်တွေ တိုးပွားပြီး ကိုယ်နဲ့ ပတ်သက်လာသမျှ တခြားလူတွေအားလုံး အပေါ်မှာလည်း မေတ္တာထားနိုင်လာတယ် . . .။
"မေတ္တာနဲ့သာ အေးချမ်းစွာ ၊ စိတ်မှာ သတိရ ။
ဘယ်လောက်ဝေးဝေး နီးနီးလေး ၊ ငေးမှိုင်မနေရ "။
" ဆရာတော်အရှင်ဆန္ဒာဓိက- ရွှေပါရမီတောရ"
(ဘယ်လောက်ဝေးဝေး နီးနီးလေး- စာ- ၅၉-၆၅ )
No comments:
Post a Comment