ကထိန်သင်္ကန်း လှူဒါန်းနိုင်သူများ
+++++++++++++++++++
ကထိန်သင်္ကန်းကို လှူဒါန်းနိုင်သော ပုဂ္ဂိုလ်များမှာ-
၁။ လူ
၂။ နတ်ဗြဟ္မာ
၃။ ရဟန်း
၎။ ရဟန်းမ
၅။ သာမဏေ
၆။ သာမဏေမ
၇။ သိက္ခမ
ဤပုဂ္ဂိုလ်(၇)ဦးတို့တွင် မည်သူမဆို တစ်ဦးဦးသည် တစ်ဦးတည်းဖြစ်စေ၊ စုပေါင်း၍ဖြစ်စေ သီတင်းကျွတ် လပြည့်ကျော်(၁)ရက်မှ တန်ဆောင်မုန်းလပြည့်အထိ ကထိန်ခင်းရန် အချိန်ကာလအတွင်း၌ လှူဒါန်းလိုသော ကျောင်း၊ ကျောင်းတိုက်သို့သွားရောက်၍ ကထိန်ဒါယကာအဖြစ် ခံယူကာ ကထိန်သင်္ကန်းလှူဒါန်းနိုင်ပါသည်။
ကထိန်သင်္ကန်း လှူရာတွင်-
- ရဟန်းတစ်ပါးပါးအားသာ လှူဒါန်းခြင်း
- ရဟန်းနှစ်ပါးသုံးပါးသာ ကပ်လှူဒါန်းခြင်း
- ရဟန်းလေးပါးနှင့်အထက် သံဃာအားလှူဒါန်းခြင်း
ဟူ၍ရှိရာ သံဃာကို ရည်ညွှန်း၍လှူမှသာ ကထိန်သင်္ကန်းအလှူဖြစ်နိုင်ပါသည်။
သံဃာအား ရည်ညွှန်းရာဝယ်-
၁။ အရပ်လေးမျက်နှာရှိ သံဃာကိုရည်ညွှန်း၍ လှူအပ်သော သံဃိကဒါန
၂။ ကထိန်ခင်းရာကျောင်းတိုက်အတွင်းရှိ သံဃာအပေါင်းကိုသာ ရည်ညွှန်း၍ လှူအပ်သော သံဃိကဒါန ဟူ၍ နှစ်မျိုးရှိရာ တစ်မျိုးမျိုးဖြင့် ကထိန်သင်္ကန်းကို လှူဒါန်းနိုင်ပါသည်။
ထိုကထိန်သင်္ကန်းကိုယူ၍-
''ဣမံကထိန စီဝရံ သံဃဿဒေမ''
''ဤကထိန်လျာသင်္ကန်းကို သံဃာတော်အပေါင်းအား လှူဒါန်းပါကုန်၏။''
ဟူ၍ ဆို၍ လှူဒါန်းရပါသည်။
No comments:
Post a Comment