သင် တရားကြောက်သလား
===================
ပုထုဇဉ်လူသားတို့ရဲ့စိတ်ဟာ မကောင်းမှုမှာ မွေ့လျော်ကြပါတယ်။ အဲဒီစိတ်ဟာ ကာမဂုဏ် တရားတွေနဲ့ ပျော်မွေ့တယ်လေ။ ဒါဟာ သာမန်လူသားတို့ရဲ့ အားနည်းချက်ပါပဲ။ အသက်သတ်ရတာ အဆင်ပြေပေမဲ့၊ သနားစိတ်ပွါးဖို့တော့ ခက်တတ်တယ်။ သနားခြင်း ကရုဏာ ဆိုတာ ကောင်းတဲ့တရားပဲမလား။ ဒါဆို ကျင့်သုံးဖို့ကျတော့ ဘာလို့ခက်နေကြရတာလဲ။ ကရုဏာ က ကိုယ့်အတွက်မကောင်းလို့လား၊ ကျင့်သုံးဖို့ မသင့်တော်လို့လား။ သူများကို နှိပ်စက်ရတာက ပျော်ရွှင်မှုကိုရစေတယ်လို့ ထင်နေလို့လား။ ဒါမှမဟုတ် သူများဂုဏ်သိက္ခာကို ဖျက်ဆီးရတာကို အရသာတွေ့နေတာလား။
ဗုဒ္ဓဘာသာကောင်းတစ်ယောက် ဖြစ်ဖို့အတွက်ဆိုရင် ကိုယ့်ကိုယ်ကို မေးခွန်းတွေ အများကြီး မေးဖို့လိုပါတယ်။ ပထမဆုံး ရှင်းရှင်းလင်းလင်းသိထားရမှာက ၅ ပါးသီလ ဆိုတာ အခြေခံအကျဆုံး လိုအပ်တဲ့ ကျင့်စဉ်ဆိုတာပါပဲ။ အဲဒါဟာ ဗုဒ္ဓဘာသာ တစ်ယောက်ရဲ့ တန်ဘိုး၊ ဒါမှမဟုတ် စံ ပါပဲ။ ဒါ့အပြင် ၅ ပါးသီလဆိုတာ ဗုဒ္ဓဘာသာတစ်ယောက်အတွက် လူ့ကျင့်ဝတ်ဆိုင်ရာ တန်ဘိုးလည်းပဲ ဖြစ်ပါတယ်။ ဘုရားရှင်ရဲ့ တရားတော်အားလုံးဟာ လူသားမျိုးနွယ်ရဲ့ ကျင့်ဝတ်တရားတွေနဲ့ တိုက်ရိုက်ပတ်သက် ဆက်နွယ်နေပါတယ်။
ရိုးသားမှု၊ ဖြောင့်မတ်မှု၊ ကတိတည်မှု၊ သစ္စာရှိမှု၊ တရားမျှတမှု၊ အများအတွက် ကြောင့်ကြစိုးရိမ်မှု၊ အများအတွက် လေးစားမှု၊ အကောင်းဆုံးဖြစ်ဖို့ ကြိုးစားမှု၊ ဂုဏ်သိက္ခာ အစရှိတာတွေဟာ လူ့ကျင့်ဝတ် စံနှုန်းတွေပေါ့။ ဒီအချက်တွေအားလုံးဟာ ဗုဒ္ဓဘာသာတစ်ယောက်ရဲ့ အခြေခံသီလ အပေါ်မှာအခြေတည်ပြီး ဖြစ်လာတာပါ။
ကိုယ်ကျင့်တရားကောင်းတဲ့ လူတစ်ယောက်ဟာ အလွဲတွေပြော၊ တစ်ချို့တစ်ဝက်ပဲအမှန်ပြောပြီး တမင်သက်သက် လူတွေကို မလှည့်စား၊ မလှည့်ဖျားတတ်ဘူး။ မုသာဝါဒကို စောင့်ထိန်းရင် သင်ဟာရိုးသားမှာပါပဲ။ ကတိတည်မယ်။ လူတွေနဲ့ ကိုယ့်ရဲ့စကားအပေါ်မှာ သစ္စာရှိမယ်။
ဘုရားရှင်ရဲ့တရားတော် အခြေခံသဘောတရားတွေကို လိုက်နာရင် အမှန်တရားအတွက် လုပ်ကိုင်ရတာကို မြတ်နိုးမယ်၊ လူတွေကို တန်းတူဆက်ဆံတာကို မြတ်နိုးမယ်၊ ပြီးတော့ မတူကွဲပြားမှုတွေကို လက်ခံဖို့ မြတ်နိုးပါလိမ့်မယ်။ အမြင်ကျယ်တဲ့အတွက် ကိုယ်မှားရင် မှားတယ်လို့ ၀န်ခံဖို့ဝန်မလေးတတ်ပါဘူး။ ကိုယ်မှားတာကိုသိတဲ့အခါ ကိုယ့်အနေအထားနဲ့ ယုံကြည်ချက်ကို ပြောင်းလဲပစ်ဖို့ အဆင်သင့်ဖြစ်နေတတ်ပါတယ်။
တရားကျင့်တာကြာလေလေ၊ အကြင်နာတရားနဲ့ သနားစာနာမှုတရား အားကြီးလေလေ ဖြစ်လာတဲ့အတွက် လိုနေသူတွေကို ကူညီချင်စိတ်ဖြစ်လာပါလိမ့်မယ်။ အကျင့်တရားကြောင့် ရလာတဲ့ ဂရုစိုက်တတ်မှုကြောင့် လူတွေအတွက် စိုးရိမ်တတ်လာပါတယ်။
တရားကျင့်တဲ့အတွက် တစ်ခြားသူတွေကို လေးစားတတ်မယ်။ လူသားအားလုံးရဲ့ လူ့ဂုဏ်သိက္ခာ၊ တစ်ကိုယ်ရည်လွတ်လပ်မှု၊ အခွင့်အရေးတွေ နဲ့ အကျိုးတွေကို လေးစားတတ်လာမယ်။ ယဉ်ကျေးတဲ့အတွက် လူအားလုံးကို တန်းတူလေးစားမှုနဲ့ ဆက်ဆံတတ်မယ်။ လိင်ခွဲခြားမှု၊ လူမျိုးရေးခွဲခြားမှု မပါပဲ လူတွေရဲ့ ဂုဏ်သိက္ခာကို လေးစားတတ်လာမယ်။ ကိုယ်နေတဲ့ လူ့ဘောင်ကို အကောင်းဆုံးတွေပေးမယ်။ ဒါ့အပြင် ကိုယ်ကိုယ်တိုင်နဲ့ ကိုယ်အဖွဲ့အစည်းရဲ့ ဂုဏ်သိက္ခာကို ကာကွယ်ပါလိမ့်မယ်။ တရားကျင့်ထားတဲ့သင်ဟာ ကိုယ့်သက်ဆိုင်ရာ အစုအဖွဲ့ရဲ့ ဂုဏ်သိက္ခာကို ထိခိုက်စေမဲ့ အရာမှန်သမျှ ဘာကိုမှ လုပ်မိမှာမဟုတ်ပါဘူး။
ဒါဟာ တရားတော်ကို ကျင့်သုံးခြင်းရဲ့ ကောင်းကျိုးပါပဲ။ သင်ဘယ်လိုသဘောရပါသလဲ။ ဗုဒ္ဓဘာသာဝင်အားလုံး ဘုရားရှင်ရဲ့ လမ်းညွှန်မှုကို လေးစားစွာနဲ့ လိုက်နာကြမယ်ဆိုရင် ဘာအတိုက်အခိုက်၊ ဘာအန္တရာယ်မှ ရှိတော့မှာမဟုတ်ပါဘူး။ ဒီတော့ သင်တရားကို ကြောက်နေတုန်းပဲလား။ တရားတော်အတိုင်း လိုက်နာကျင့်ကြံလိုစိတ်ရှိပါရဲ့လား။ သင့်ကိုယ်သင် မေးဖို့ ဒီမေးခွန်းလေး ချန်ထားပေးခဲ့ပါတယ်။
အားလုံး တရားကျင့်ပြီး ပျော်ရွှင် ဘေးကင်းကြပါစေ။
အရှင်သုစိတ္တ (မော်ကျွန်း)
credit - Thuseikta Thu
No comments:
Post a Comment